Det vart til tider eit ampert oppgjør då laget frå havlandet hadde teke turen til Hellesylt i håp om nye poeng. Poenga vart verande hos heimelaget. Gjestane måtte fullføre med ni mann etter at domar Jim Dyb leita fram to raude av haustens fargar til Gursken/Larsnes.

Sunnylven opna med skoring alt etter to minutt, eit hjørnespark som kaptein Jørgen Helset stanga i ”kassa”. Og snart stod det 2-0, Alf Ole Sundgot vart takla og straffesparket dundra Bård Forbord i nota. Det vart også pauseresultatet.

Etter kvart vart det tøffe tak ute på bana i andre omgang, og då målmann på GuLas delja til Jens Arve Forbord, vart det dusjen neste for gjestane sin burvaktar.

Sunnylven gjekk snart opp til 3-0 ved Olav Åge Åsen, og 4-0 på nytt straffespark ved Jens Arve Forbord. Her vart Alf Ole Sundgot på nytt hekta ulovleg, og ein ny spelar hos gjestane vart utvist.

Alf Ole Sundgot avslutta skoringsfesten for Sunnylven med to mål på slutten og fastsette sigeren til 6-0.

Sunnylven var best, det var svært fortent med tre poeng. Spelarane gjennomførte ein god kamp samanlikna med oppgjøret mot HaNo. Veldig kjekt å vinne og ta tre poeng igjen, sa trenar Sindre Hjelle som slit med liten spelarstall, men har tru på at laget vil halde seg i 4. divisjon.