Etter fleire flotte kampar vart oppgjøret mot Bergsøy ein nedtur for Sunnylven. 2-0 tap er ikkje skræmande, men det vart ingen poeng. Sunnylven står framleis med 14 poeng på 6. plass når 10 serierunde er ferdig, og det er betre enn forventa i utgangspunktet.

Største sjansen i fyrste omgang hadde Alf Ole Sundgot. Åleine med keeper og utan press klarte ikkje den gode spissen å overliste burvaktaren på heimelaget. Laga gjekk til pause med 0-0.

I andre omgang tok Bergsøy føringa etter 65. minutt. Eit unødvendig balltap på midten førte til angrepet og 1-0. Og i det 90. minutt la heimelaget på til 2-0. To minutt før burde Sunnylven utlikna på dødball, men Hans Kristian Stadheim mislukkast med avslutninga. Dette var kampen då ingen ting lukkast for Sunnylven. Kanskje går det betre når Herd kjem på besøk torsdag.