Det var flotte speleforhold på Stranda stadion då Stranda og Sunnylven møttest til nytt nabooppgjør i 4. divisjon. Heimelaget var favoritt sjølv om treningskampane ikkje har enda med overbevisande resultat. Og i kampen søndag let fyrste skoring vente på seg. Laget makta ikkje å overliste Kåre Andre Bjørnes i Sunnylvsmålet i fyrste omgang. Bjørnes viste klasse ved fleire høve, reaksjonssterk på strek og stor rekkevidd i feltet.

Det vart i staden Sunnylven som tok leiinga. Eit frispark frå 50 meter av Olav Åge Åsen stussa Terje Flåm i mål ved stolperota. Fleire mål kom ikkje i fyrste omgang.

Sunnylven opna best i andre omgang, og ein god Thomas Hove i Stranda-målet hadde englevakt. Heimelaget dominere banespelet, Stranda er eit ungt og teknisk godt lag, men innlegg fram for mål og avslutningar gjekk i alle retningar søndag. Etter eit kvarter kom likevel utlikninga. Då dukka Tonny Åsen opp på rett plass, og etter sommel i Sunnylvs-forsvaret, pirka han ballen i mål til 1-1.

Nytt Stranda-mål
Andre omgang vart etter kvart tung for begge lag. Kato Vangen, heimelaget sin beste, hadde derimot ork igjen. Eit kvarter før slutt kom han seg laus på venstresida og dundra markkryparen i mål til 2-1 for Stranda. Matchvinnaren vart seinare skada då han vart hekta på veg igjennom av Arne Storstein. Kapteinen til Sunnylven fekk raudt kort for taklinga som siste mann og mister dermed heimekampen mot Norborg.

Sunnylven måtte vende heim utan poeng sjølv om uavgjort hadde vore mest rettferdig etter antall målsjansar for dei to laga. Og i sluttminutta dansa ballen på målstreken til Hove ved to høve etter corner.

Til neste kamp heime mot Norborg må Sunnylven mønstre fleire nye spelarar. Arne Storstein får karantene, Alf Ole Sundgot reiser tilbake til militære, medan Hans Kristian Stadheim melder overgang til Oslo-klubben Hasle-Løren.