Få målsjansar
At det skulle vere divisjonsforskjell på laga, synte ikkje på spelet i denne kampen. Faktisk hadde heimelaget fortent alle poenga. Alt i fyrste minutt måtte Bjørnar Hoel i Rollon-målet finte eit hardt skot over til hjørnespark.
Det vart få store sjansar i fyrste omgang, men det får ei tung og glatt bane ta litt av skulda for. Tempoet var lavt og pasningane upresise. Eit godt heimeforsvar der mellom anna trenar Sindre Hjelle hadde teke plass, gjorde gjestane ufårlege. Både Kim Sture Flo og Arne Storstein var ikkje med grunna reise.
I tverrliggaren
I andre omgang vart tempoet skrudd opp og heimelaget spela seg til fleire "feite tilbod". Mellom anna small ballen i tverrliggaren og over to gonger, frå Alf Ole Sundgot og Jan Ove Aslaksen. Også Bård Forbord, Hans Kristian Stadheim og Olav Åge Åsen kunne ha gjort årets siste heimekamp til festdag for dei 88 betalande, men ballen kom
aldri i mål.
Sendt i dusjen
Håkon Mikal Dalen kom inn mot slutten og fekk brutal behandling i duell med Terje Vestre. Alt for hardt, og Rollon-spelaren fekk sjå det raude kortet og marsjordre av dommar Frank Hansen. Godøy-dommaren leia kampen glimrande.
Det slutta mållaust i årets siste A-kamp på Hellesylt stadion. Det eine poenget var likevel nok til fornya kontrakt for Sunnylven.
Rollon spela nok ikkje opp mot sitt beste laurdag, det var langt frå 3. div.-takter over laget i denne kampen. Etter reaksjonar vi såg frå Rollon-benken, meinte nok trenar Elling Kjerstad det same. Best hos gjestane var supportergjengen frå Blue Army, som stod på gjennom 90 minutt med oppmuntrande tilrop til sine fotballidol i kvitt og blått.
Publikumsjuryen kåra Jan Ove Aslaksen til heimelaget sin beste spelar laurdag.
Ein serierunde gjenstår, då møter Sunnylven HaNo. Truleg går Vigra og Ellingsøy ned, Hovdebygda og naboklubben Stranda er to av dei nye laga i 4. divisjon.