Og med 5-1 til Sunnylven etter dei to oppgjera, er mykje retta opp av det som skjedde sist Stranda og Sunnylven var i same divisjon. Denne gongen vart det ikkje heimreise som slakt, men som heltar. Den ivrigaste klanen av tilhengarar til laget møtte opp på kampen, og på Stranda var dei både flest og best, både i antall og lydnivå.

Kampen torsdag kveld starta med lange pasningar fram og tilbake, store målsjansar let vente på seg.
Sunnylven opna best, topplaget i 4. divisjon hadde tydeleg til hensikt å ikkje tape dette nabooppgjeret. Mannskapet var godt organisert, og ein av superveteranane på laget, Jens Arve Forbord var i praktslag mot gamleklubben sin denne kvelden. Etter 14. minutt gjorde Forbord like godt 1-0 til Sunnylven etter langt innkast frå Arne Storstein.
Då jubla sunnylvspatriotane i eit lydnivå som er sjeldan å høyre på Mona.

Omgangen ebba ut med denne skoringa. Spede forsøk frå begge lag valda ikkje problem for dei to målmennene, Stranda hadde feil retning på dei fleste skot, og Sunnylven sine to på topp, Alf Ole og Tonny var det vesle sekundet for seint ute i avslutninga.

Andre omgang starta med kjempesjanse til Stranda, men ballen nådde ikkje nettmaskene. Heller ikkje i det 58. minutt. Skotet innafor høgre stolpe etter mølje i sunnylvsfeltet, vart kontant rydda unna på strek av Hans Kristian. Det var Stranda sin alle største sjanse til redusering torsdag.
Like etter var det Tonny Åsen sin tur utan å lukkast, og noko seinare skaut Alf Ole markkrypar utanfor. Men etter 67. minutt lukkast det for superraske Alf Ole, Sunnylven sin toppskorar då han ikkje trekte seg i duell med Thomas Hove i Strandamålet. Dermed stod det 2-0 til dei raude, og sigeren var sikra. Tre nye poeng og topplassen i 4. divisjon var ytterlegare trygga.

Spelemessig tok kampen seg mykje opp i andre omgang. Lett regn gjorde den grøne og flotte grasmatta glatt for spelarane, men Sunnylven sitt mannskap imponerte med god organisering og trykt forsvarsspel i denne kampen. Ein fullt fortent siger som etter spel og sjansar heller kunne blitt større.

Alle på laget gjorde manns jobb, men ein liten ekstra konfekt går til forsvarsspelar Olav Åge Åsen denne gongen.