Lagkapteinen
I ni år venta han på å få revansj over braktapa 7-0 og 6-0 for Stranda i 1995. Laurdag 15 mai var det eit faktum. Arne Storstein kunne smile over ein herleg revansj, til og med på heimebane.

Lagkapteinen til Sunnylven slit med skade. Før kampen mot Stranda var det uvisst om han kunne spela, eit kne skal snart ”under kniven”, og etter kampen på Eidså 1. mai har høgre rist valda smerter. Uansett smerter eller ikkje, dette fotballoppgjøret skulle han vere med og avgjere for heimelaget.
Arne Storstein spela heile kampen, og gjorde som alltid ein solid jobb i venstreforsvaret i sin kamp nr. 455.

Vinnarvilje
Saman med Henning Nydahl, Tor Odd Kjellstadli og Olav Åge Åsen, kanskje kampens beste, rydda dei unna kompromisslaust både høgt og lavt.
På midtbana sprang kantspelarane Stian Ljøen Melchior og Hans Kristian Stadheim langt og utretteleg, og saman med Bård Forbord og Kalle Hjelle jobba dei steinhardt i søk etter å ”mate” dei to spissane, Tonny Åsen og Alf Ole Sundgot. Laget ville vinne kampen. Om ikkje spelet stod til meir enn ein trear, var innsatsen verd det dobbelte.

I fyrste omgang vart det mest kjemping mellom sekstenmeterfelta frå begge lag. Det skjedde lite som valda problem for dei to keeperane. Berre litt dramatikk ved eitt høve for Knut Martin Tryggestad som debuterte med ein flott kamp i mål for Sunnylven.

Stranda prøvde heile tida å drive opp tempoet i kampen, og greidde det så lenge kondisjonen heldt. Sjølv om dei hadde eit spelemessig overtak i fyrste omgang, skapte dei lite av klare målsjangsar. Det stod 0-0 ved pause.

Korrekt straffe
Tretten minutt ut i andre omgang tok Stranda leiinga ved Thomas Melgårdsbakken. Jubelen over målet hadde knapt stilna før Alf Ole Sundgot vart lagt i bakken av lagkaptein Thomas Roset i straffefelte.
Dommar Hatlehol var ikkje i tvil og peika på 11-meteren. Sundgot sette ballen sjølv sikkert i mål.

Frå då og ut var Sunnylven best og sikra seg alle poenga med to nye skoringar bak Preben Bjørdal i Stranda-målet.

Fyrst eit herleg frispark frå 30 meter, servert av Kalle Hjelle rett i mål, men det burde Bjørdal avverga. I forlenga speletid kom tredje mål til heimelaget, ekspedert i nota av Alf Ole Sundgot, etter pasning frå innbyttar Ole A. Ringdal.

God dommar
Stranda har eit ungt mannskap og kan få eit storlag med åra om spelarane blir i klubben. At laget har skora berre fire mål på fire kampar, må vere skuffande. Kanskje er forventningane frå eigne leiarar og supporterar litt store, kva veit vi.

Dommar Oddbjørn Hatlehol leia kampen godt, var tolmodig og venta med å blåse frispark før fordel i spelet ikkje kom. Tre gule kort to til Stranda ved Relling og Melgårdsbakken, og eitt til Bård Forbord på Sunnylven som dermed må stå over neste kamp mot Skarbøvik 2.

Assistentdommar Ernst Myhre, Spjelkavik IL var også på plass, Rolv Langva, Hessa IL møtte ikkje av ukjent grunn.