Eit resultat heimelaget truleg er minst nøgde med.
Kampen gjekk under flotte speleforhold, der Sunnylven opna klart best. Alt etter fire minutt stod det 1-0, etter eit innlegg mot Vartdal-målet, som Arne Storstein stupheada i mål. Og eit stort heimepublikum fekk meir å juble for ut over i omgangen, då serieleiaren dominerte spelet i lange periodar. Etter 20 minutt hadde laget sjansen til å auke leiinga. Jens Arve Forbord vart takla ulovleg innafor straffefeltet, men skotet frå 11-meteren sette Alf Ole Sundgot til side for mål.
Derimot gjorde same spelar ingen feil då han etter 28 minutt lobba eit framspel vidare over ein utrusande Vartdal-keeper. Men 2-0 leiinga til Sunnylven varte i berre to minutt. Misforståing mellom forsvar og målmann utnytta Vartdal, og Nils Dragnes sette ballen i ope mål.

Vartdal utlikna
Om fyrste omgang vart dominert av heimelaget, var gjestane best i store deler av andre.

Sunnylven vart pressa tilbake, forsvaret lempa unna, men andreballen hamna hos dei blå-kvite. Det var berre eit spørsmål når utlikninga kom.
Etter 78 minutt fekk Rolf Audun Vartdal stjernetreff frå 20 meters hald, og ballen susa i nettmaskene oppe til venstre for Kåre Andre Bjørnes.

I sluttminutta kunne begge lag ha sikra seg alle poenga. Nærast var nok heimelaget med nye stangskot. I heile kampen noterte vi fem i stolpane og ut for Sunnylven, mange etter frisparklegg frå Kalle Hjelle.

Hos heimelaget var Olav Åge Åsen på ny solid i forsvar. Kanskje spela ikkje Sunnylven sitt mannskap opp mot sitt beste denne gongen.

Vartdal var som mange av dei andre laga i 5. divisjon ein god motstandar, truleg ein av dei beste 5. divisjonane på Sunnmøre mange år.

Etter som både Skodje og Blindheim/Emblem vann sine kampar i den 18. serierunden, nærmar dei seg i poengsamandraget.
Opprykk er enno ikkje avgjort, så utfallet av heimekampen mot Larsnes laurdag, kan vere svært viktig.