Fyrste omgang starta nærast som stillingskrig mellom laga, spelet foregjekk på midtbana, og dermed få sjansar til begge lag. Etter 22 minutt kunne Trond Tryggestad ha ordna leiing til heimelaget, men skotet strauk målstolpen på utsida. Vi noterte ein kjempesjanse til gjestane etter 37 minutt, men Sunnylven sin gode målmann, Kåre Andre Bjørnes slo ballen over og til hjørnespark. Den vart det heller ikkje mål på.

Meir fart i andre

I pausen hadde nok Sunnylven bestemt seg for å gå til litt meir, å vinne duellane mann mot mann. Og sjansane kom fleire no enn i fyrste.
7 minutt ut i omgangen kunne både Jens Arve Forbord og Trond Tryggestad putta ballen i mål frå kort hald, med det ville seg ikkje. Sunnylven pressa stort, det var stadig nære på at det vart nettkjenning uten at det lukkast. Spelarane la ned ein kjempeinnsats på den tunge bana.

Og etter 38 minutt vart det jubel mellom publikum på tribunen. Eit av mange hjørnespark til heimelaget ordna Jens Arve Forbord inn like ved krysset, og det stod 1-0. Fem minutt seinare var leiinga dobla, Kalle Hjelle vart spela nydeleg fri på venstrekanten og kunne ha gjort målet sjølv. I staden la han til høgre og Morten Overå nærast trilla ballen i mål.

På eit hardt kjempande heimelag som vann fortent, var Bård Forbord god. Også forsvaret hadde ein god dag, der Kåre Andre Bjørnes imponerte med sikkert spel i målet.

Tove Marie Tandstad frå VRF dømde godt, og beheldt alle kort i lomma.