Sunnylven Fotball aukar budsjettet
Sunnylven IL Fotball satsar på stor bredde i det sportslege tilbodet komande sesong. Framlegg til budsjett syner auka omsetning på 41 % frå 2007.
Budsjettframlegget som blir behandla på styremøte komande veke er på totalt 435.000,- og balanserer med eit overskot på 3.000,-. Sunnylven stiller A-lag senior, damelag, juniorlag og fleire lag i aldersbestemte klasser. Det fører til større påmeldingsavgifter, reiseutgifter, godtgjersle til trening og instruksjon, og til dommarar. Også utstyr til laga vil bli auka. På utgiftssida ligg også innbaka kostnader med Norway Cup-deltaking, sosialturar og turneringar.
Inntektene skal i fylgje budsjettframlegget aukast gjennom at fleire betaler treningsavgift, større kiosksal, lotteri, auka billettinntekter på grunn av damelaget, større sponsorstøtte og andre inntektsbringande tiltak.
-Det vil by på store utfordringar å få inn nok inntekter, for budsjettet er auka kraftig i høve til 2007. Det er naudsynt for å gje betre tilbod til både spelarar/trenarar/oppmenn,- skriv leiar Steinar Hjelle i ein kommentar til budsjettframlegget. Fotballgruppa ynskjer å likestille A-laget herrar og A-laget damer med kampavvikling på heimebane.