Kampen mellom Sunnylven og Bergsøy vart ei spanande og sjåverdig forestilling under gode speleforhold på Hellesylt stadion. Dette kunne vere vinn eller forsvinn frå 4. divisjon for heimelaget. Nedrykk skulle i tilfelle -koste dyrt-, for dei raude og blå kjempa som løvar frå start av.

Ny taktikk

Eit ungt heimelag hadde fått visse forsterkingar frå tapet mot Rollon. I mål var Knut Martin Tryggestad tilbake med eit solid forsvar framom, og på midtbana dirigerte rutinerte Kalle Hjelle i stor stil. Framme herja løpssterke Hans Kristian Stadheim, eit -sjakktrekk- frå trenaren som skulle vise seg å resultere i tre poeng.

Det gjekk ikkje meir enn 9. minutt av kampen før gjestane måtte bruke ureint spel for å stoppe Hans Kristian. Straffeskotet til Jan Ove Aslaksen gjekk i stolpen og ut til ingen ting. Etter halvtimen retta Aslaksen opp straffebommen då han gav Sunnylven fortjent leiing på ein hard markkrypar. Laga gjekk til pause på 1-0 leiing til heimelaget.

Andre omgang var 7. minutt gamal då innbyttar Jarl Eirik Larsen auka leiinga til 2-0 på ein flott lobb over Toni Sandanger i Bergsøy sitt mål.

Jubelrop

Fleire mål vart det ikkje sjølv om Sunnylven som det beste laget var nære skoring fleire gonger. Det unge heimelaget imponerte stort i denne kampen som fyrst og fremst var ein lagsiger. Bergsøy fekk lite til, anten hamna skota i klypene til Tryggestad eller  det minte om haustjakt på flygande måsar. Taktikken frå trenar Sindre Hjelle om å slite, rive opp og mørne motsatandar frå start av virka tydeleg perfekt. -Godt å høyre jubelropa i garderoba igjen,- tykte ein stornøgd trenar etter kampslutt. Sigeren var den fyrste i haust og gav fornya kontrakt i 4. divisjon til neste sesong.