Ole Ringdal A/S møter Union Hotel
Søndag brakar Ole Ringdal A/S og Union Hotel Geiranger saman om best med fotballen på Hellesylt stadion. Truleg ligg mykje utradisjonell trening bak før møtet mellom dei to laga.
Når vårsola varmar er Hellesylt stadion ei boblande kjelde for unge, eldre og tribuneslitarar. Her er det fotballkampar, ikkje berre om poeng og tittlar, men også for liv, moro og hygge.
Søndag 1. juli er det ny showkamp mellom Ole Ringdal A/S og Union Hotel, Geiranger. Kampen går kl. 17.00, og den bør mange få med seg.
Vi har ikkje spionert på treningane til dei to laga framfor prestisjeoppgjøret. Men vi veit at i Geiranger vart det lagt nytt kunstgras i ballbingen i vår, truleg for at servitørane på turisthotellet skulle få gode forhold med fotballen. Sjølv om ballbingen er langt mindre enn Hellesylt Stadion, er den likevel ein større treningsarena enn korridorar og dansesal på hotellet.
Korleis slaktarane på Hellesylt har trena veit vi heller ikkje. Det har nok gått i å sparke vekk kumagar og oksetestikklar, eller tome pappkasser på pakkeriet.
Møt fram på stadion og opplev stor fotball og eit spanande oppgjør, leia av fløyteblåsar Bård Forbord.