Mot storform for Steffen

Steffen Andreas Hole viste god form i testrenn sist helg.

På 7.5 km. rulleski klassisk gjekk det styggfort for 16-åringen frå Sunnylven. Klassekameratar frå den nystarta langrennslinja ved Stranda vidaregåande skule kom bak alt frå start av, og tok han aldrig igjen. At både klubbkamerat Per Ove Frøysa og ikkje minst Eirik Helsem, Stranda var bak i tid var både sterkt og litt overraskande. I mål skilde det ca. to minutt til Per Ove og 26 sek. til Eirik.

-Jau det var artig vedgår Steffen Andreas. Då vi snakka med han på mobil var det leksearbeid på hybelen på Stranda. Tidlegare på dag hadde dei gjort unna ei to timers treningsøkt på skulen, som er vanleg kvar dag i den nystarta langrennsgruppa.
I tillegg til dei tre nemde gutane, er Tarjei Lund Tafjord, Eidsdal, Kjersti Hoel, Valldal og Marthe Hjellbakk Hole, Sunnylven elevar der.

Steffen Andreas har auka treningsmengda i sommar i høve til tidlegare. Det har blitt mykje rulleski, og han føle at han har blitt sterkare, seier han. I tillegg har han strekt seg mange centimeter frå i fjor.

Det går mot vinter og snø, og det blir spanande å følge med når konkurransesesongen startar, både med Steffen Andreas og hans konkurrentar.